អំពីយើង | សាររបស់ប្រធានក្រុមប្រឹក្សាភិបាល
តាមការព្យាករណ៍របស់ធនាគារពិភពលោកមើលឃើញថា សេដ្ឋ កិច្ចរបស់ប្រទេសកម្ពុជាបានបន្តងើបឡើង វិញនៅក្នុងឆ្នាំ២០២២ ដែលការងើបឡើងវិញលើវិស័យសេវាកម្មដែលមានភាពរឹងមាំ និង ការជំរុញឱ្យមានតម្រូវការខ្ពស់នៃអ្នកប្រើប្រាស់។ ហើយកំណើនសេដ្ឋកិច្ចសម្រាប់ឆ្នាំ២០២៣ ត្រូវបានព្យាករណ៍ថានឹង ឈានដល់ ៥.២ ភាគរយ។ ដែលហានិភ័យនៃការធ្លាក់ចុះនេះ រួមមានការធ្លាក់ចុះគួរឱ្យកត់សម្គាល់នៃតម្រូវការខាងក្រៅ ការរឹតបន្តឹងផ្នែកហិរញ្ញវត្ថុ សកល និងការធ្លាក់ចុះតម្លៃប្រេង។ ម្យ៉ាងវិញទៀត ការបើកដំណើរ ការឡើងវិញរបស់ប្រទេសចិន បង្ហាញពីឱកាសមួយសម្រាប់កម្ពុជា ក្នុងការជំរុញឧស្សាហ៍កម្ម ទេសចរណ៍ ការធ្វើដំណើរ និងការទាក់ទាញលំហូរវិនិយោគពីបរទេស។ ដំបូងឡើយមានការស្ទុះងើបឡើងវិញនៃផលិតកម្មដែលផ្តោតលើការនាំចេញ និងកត្តាជំរុញកំណើន វិស័យ សេវាកម្ម ដោយតម្រូវការអ្នកប្រើប្រាស់មានការកើនឡើង និងការត្រឡប់មកវិញនៃភ្ញៀវទេសចរបរទេស។ នេះជាការប៉ះប៉ូវនៃការធ្លាក់ចុះក្នុងពេលថ្មីៗនេះក្នុងការនាំចេញទំនិញរបស់កម្ពុជាដែលរងផលប៉ះពាល់ដោយការធ្លាក់ចុះនៃតម្រូវការខាងក្រៅនានា។ ការប្រើប្រាស់ក្នុងស្រុកក៏កំពុងត្រូវបានជំរុញដោយមានការបន្ធូរបន្ថយអតិផរណាដែលបានធ្លាក់ចុះមកត្រឹម ២.៩ ភាគរយ ក្នុងខែធ្នូ ឆ្នាំ២០២២ ដោយសារតម្លៃថាមពល និងអាហារមានស្ថិរភាព។
ទន្ទឹមនឹងនេះ សេដ្ឋកិច្ចកម្ពុជាបានធ្លាក់ចុះដោយសារតែឥទ្ធិពលនៃសង្គ្រាមរវាងរុស្ស៊ី-អ៊ុយក្រែនដែលបានអូសបន្លាយពេល និងការរីករាលដាលនៃមេរោគកូវីដកន្លងមកនោះ បានធ្វើឱ្យអតិផរណាមានការកើនឡើង និងការរំខានដល់ខ្សែសង្វាក់ផ្គត់ផ្គង់ដែលកំពុងបន្ត។ ឆ្លើយតបនឹងស្ថានភាពនេះ រាជរដ្ឋាភិបាលកម្ពុជា បានផ្សព្វផ្សាយនូវយុទ្ធសាស្ត្រ និងដាក់ចេញនូវវិធានការ ក៏ដូចជាការដាក់បញ្ចូលនូវថវិកាជាតិ ដើម្បីកាត់បន្ថយអត្រាអតិផរណា និងរក្សាកំណើនសេដ្ឋកិច្ចនៅក្នុងឆ្នាំ២០២២ និងឆ្នាំបន្តបន្ទាប់ទៀត។ លើសពីនេះ រដ្ឋាភិបាលក៏បានដាក់បញ្ចូលមូលនិធិដើម្បីជួយគាំទ្រ និងស្តារអាជីវកម្មខ្នាត តូច និងមធ្យម និងសកម្មភាពសេដ្ឋកិច្ច និងគ្រួសារក្រីក្រ និងជនងាយរងគ្រោះដែលរងផលប៉ះពាល់ដោយមេរោគកូវីដ។ តាមលទ្ធផល យន្តការទាំងនេះរបស់រាជរដ្ឋាភិបាលបានកាត់បន្ថយអត្រាអតិផរណាយ៉ាងមានប្រសិទ្ធភាព និងជំរុញកំណើនសេដ្ឋកិច្ចនៅក្នុងឆ្នាំ២០២២។
យោងតាមមន្ត្រីជាន់ខ្ពស់នៃធនាគារជាតិនៃកម្ពុជាបានលើកឡើងថា វិស័យមីក្រូហិរញ្ញវត្ថុនៅកម្ពុជាបាន និងកំពុងដើរតួនាទីយ៉ាងសំខាន់ក្នុងការរួមចំណែកដល់ការអភិវឌ្ឍន៍សេដ្ឋកិច្ច និងសង្គម ជាពិសេសការកាត់បន្ថយភាពក្រីក្រនៅតាមជនបទ។ រដ្ឋាភិបាលបានគាំទ្រវិស័យនេះ តាមរយៈការកំណត់ចក្ខុវិស័យដ៏ច្បាស់លាស់ និងយុទ្ធសាស្ត្រតម្រង់ទិសអភិវឌ្ឍន៍ ដែលអាចឱ្យវិស័យនេះពង្រីកវិសាលភាពនៃប្រតិបត្តិការរបស់ខ្លួនប្រកបដោយនិរន្តរភាព និងទំនុកចិត្តក៏ដូចជាជួយបង្កើតឱកាសថ្មីសម្រាប់ការអភិវឌ្ឍន៍សេវាហិរញ្ញវត្ថុ សំដៅផ្តល់ជូនប្រជាជនកម្ពុជានូវសេវាហិរញ្ញវត្ថុប្រកបដោយប្រសិទ្ធភាព និងភាពស្និតស្នាលបំផុត។ គិតត្រឹមដំណាច់ត្រីមាសទី៤ ឆ្នាំ២០២២ ទ្រព្យសកម្មសរុបរបស់គ្រឹះស្ថានមីក្រូហិរញ្ញវត្ថុ និងគ្រឹះស្ថានឥណទានជនបទមានប្រមាណ ៤៤,៤ ពាន់ពាន់លានរៀល (ស្មើនឹង ១០,៨ ពាន់លានដុល្លារអាមេរិក) ក្នុងនោះកម្ចីសរុបមានប្រមាណជា ៣៨,៩ ពាន់ពាន់លានរៀល (ស្មើនឹង ៩,៥ ពាន់លានដុល្លារអាមេរិក) ដែលបានផ្តល់ជូនអតិថិជនជាង ២,១ លានគណនី នៃរបាយការណ៍របស់ធនាគារជាតិនៃកម្ពុជា។ ហើយសម្រាប់គ្រឹះស្ថានមីក្រូហិរញ្ញវត្ថុទទួលប្រាក់បញ្ញើមានទឹកប្រាក់សរុបប្រមាណ ១៩,៤ ពាន់ពាន់លានរៀល (ស្មើនឹង ៤,៧ ពាន់លានដុល្លារអាមេរិក) ពីអ្នកដាក់ប្រាក់បញ្ញើប្រមាណ ២,៧ លាននាក់។ លទ្ធផលដែលទទួលបានរហូតមកដល់ពេលនេះ គឺបានមកពីការខិតខំប្រឹងប្រែងរបស់ធនាគារជាតិនៃកម្ពុជា និងកិច្ចសហប្រតិបត្តិការរបស់គ្រឹះស្ថានធនាគារ និងហិរញ្ញវត្ថុ ក្នុងការផ្តល់ប្រាក់កម្ចីជូនដល់អតិថិជនក្នុងការធ្វើអាជីវកម្ម និងផ្តល់ឥណទានរៀបចំឡើងវិញ ក៏ដូចជាការលើកកម្ពស់ជីវភាពរបស់ប្រជាពលរដ្ឋផងដែរ។ បើយោងតាមរបាយការណ៍ប្រចាំឆ្នាំ២០២២ របស់ធនាគារជាតិនៃកម្ពុជាបានបង្ហាញថា ធនាគារពាណិជ្ជមានចំនួន ៥៩ ធនាគារឯកទេសមានចំនួន ០៩ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើមានចំនួន ០៥ គ្រឹះស្ថានមីក្រូហិរញ្ញវត្ថុមានចំនួន ៨២ ប្រតិបត្តិករឥណទានជនបទមានចំនួន ២២៤ ក្រុមហ៊ុនភតិសន្យាហិរញ្ញវត្ថុមានចំនួន ១៦ អ្នកដំណើរការតតិយភាគីមានចំនួន ០៥ គ្រឹះស្ថានផ្តល់សេវាទូទាត់មានចំនួន ៣៤ ក្រុមហ៊ុនក្រេឌីតប្យូរ៉ូកម្ពុជាមានចំនួន ០១ ការិយាល័យតំណាងធនាគារបរទេសមានចំនួន ០៦ និងអាជីវករប្តូរប្រាក់មានចំនួន ២.៨៦៩។ ចំណុចនេះ យើងអាចមើលឃើញថា ទោះបីជាទទួលរងឥទ្ធិពលពីវិបត្តិ ក៏ប្រព័ន្ធធនាគារ និងមីក្រូហិរញ្ញវត្ថុនៅតែបន្តមានស្ថិរភាពរឹងមាំ និងភាពធន់ ដោយមានការបន្តបណ្តាក់ទុនបន្ថែមពីអ្នកវិនិយោគទាំងក្នុងស្រុក និងក្រៅស្រុកមកលើវិស័យនេះនៅកម្ពុជា។
ដោយសារតែមានផលប៉ះពាល់ពីការរីករាលដាលនៃមេរោគកូវីដ និងបញ្ហាអូសបន្លាយនៃសង្គ្រាមរវាង ប្រទេសរុស្សី និងអ៊ុយក្រែន នៅឆ្នាំ២០២២ នេះ ក៏បានជះឥទ្ធិពលមួយចំនួនដែលបានធ្វើឱ្យកម្រិតហានិភ័យនៃផលបត្រឥណទានមានការកើនឡើងខ្ពស់របស់ស្ថាប័នហិរញ្ញវត្ថុមួយចំនួន រួមទាំងគ្រឹះស្ថាន ហ្វូតាបា មីក្រូហិរញ្ញវត្ថុ ភីអិលស៊ី ផងដែរ។ ទោះជាស្ថិតនៅស្ថានភាពនៃការរីករាលដាលនៃមេរោគកូវីដនេះក៏ដោយក៏គ្រឹះស្ថាន ហ្វូតាបា មីក្រូហិរញ្ញវត្ថុ ភីអិលស៊ី នៅតែអាចរក្សាប្រាក់ចំណេញរបស់ខ្លួនបានចំនួន ៤៤៩.៤២៦ ដុល្លារអាមេរិក ជាមួយនឹងទ្រព្យសកម្មចំនួន ១៥.៧៤៣.៧៨០ ដុល្លារអាមេរិក។ លទ្ធផលនេះបង្ហាញពីការចូលរួមសហការពីបុគ្គលិកគ្រប់ផ្នែក និងពិសេសផ្នែកឥណទានផ្ទាល់ ដែលបានខិតខំប្រឹងប្រែងក្នុងការគ្រប់គ្រង និងដោះស្រាយឱ្យបានទាន់ពេលវេលា។
ក្នុងនាមប្រធានក្រុមប្រឹក្សាភិបាល ខ្ញុំសូមថ្លែងអំណរគុណយ៉ាងជ្រាលជ្រៅដល់អតិថិជន ភាគទុនិកជប៉ុនរបស់យើងខ្ញុំ នៅតែមានសុច្ឆន្ទៈ ចូលរួមចំណែកអភិវឌ្ឍធនធានមនុស្សជំនាន់ក្រោយនៃព្រះរាជាណាចក្រកម្ពុជា នាយកប្រតិបត្តិ ជំនួយការនាយកប្រតិបត្តិ និងបុគ្គលិកទាំងអស់របស់គ្រឹះស្ថាន ហ្វូតាបា មីក្រូហិរញ្ញវត្ថុ ភីអិលស៊ី សម្រាប់ការគាំទ្រ និងការខិតខំប្រឹងប្រែងបំពេញការងាររបស់ខ្លួន និងការអនុវត្តតាមផែនការយុទ្ធសាស្រ្តរបស់គ្រឹះស្ថាន។ ជាពិសេសចំពោះធនាគារជាតិនៃកម្ពុជា និងដៃគូសហប្រតិបត្តិការ ដែលតែងតែផ្តល់ការសហការ និងការគាំទ្រដល់គ្រឹះស្ថានយើងខ្ញុំ ដើម្បីចាត់ចែងនូវរាល់សកម្មភាពការងារទាំងអស់ប្រកបដោយតម្លាភាពរហូតមកដល់ពេលបច្ចុប្បន្ន និងនាពេលអនាគតផងដែរ។
ជាចុងក្រោយ យើងខ្ញុំសូមប្រសិទ្ធិពរជ័យ វិបុលសុខ ចូរកើតមានដល់លោកអ្នក និងក្រុមគ្រួសារ នូវសេចក្តីចម្រើនមានបានជោគជ័យ គ្រប់ភារកិច្ចការងារ ជានិច្ចនិរន្តតរៀងទៅ។