អំពីយើង | សាររបស់នាយកប្រតិបត្តិ

សាររបស់នាយកប្រតិបត្តិ

ជូនចំពោះអតិថិជន និងដៃគូពាណិជ្ជកម្មជាទីគោរព!

សូមជម្រាបជូនថា គ្រឹះស្ថាន ហ្វូតាបា មីក្រូហិរញ្ញវត្ថុ ភីអិលស៊ី បានទទួលអាជ្ញាបណ្ណជាស្ថាប័នហិរញ្ញវត្ថុ ពីធនាគារជាតិនៃកម្ពុជា ដើម្បី ប្រកបសកម្មភាពអាជីវកម្ម នៅថ្ងៃទី១៦ ខែធ្នូ ឆ្នាំ២០១៥។ ដោយមើលឃើញពីដំណើរការជាវិជ្ជមាននៃការប្រតិបត្តិ និងការគ្រប់គ្រង ព្រមទាំងផែនការយុទ្ធសាស្រ្តវែងឆ្ងាយទៅថ្ងៃអនាគត របស់គ្រឹះស្ថាន ហ្វូតាបា មីក្រូហិរញ្ញវត្ថុ ភីអិលស៊ី កាលពីថ្ងៃទី៣០ ខែធ្នូ ឆ្នាំ២០១៩ ធនាគារជាតិនៃកម្ពុជា បានសម្រេចផ្តល់អាជ្ញាបណ្ណអចិន្ត្រៃយ៍សម្រាប់ប្រកបអាជីវកម្មជាផ្លូវការមកឱ្យគ្រឹះស្ថាន ហ្វូតាបា មីក្រូហិរញ្ញវត្ថុ ភីអិលស៊ី  ជំនួសឱ្យអាជ្ញាបណ្ណដែលមានកំណត់រយៈពេល ៣ឆ្នាំ។ ហើយក្នុងអំឡុង ឆ្នាំ២០២៣ នេះ គ្រឹះស្ថាន ហ្វូតាបា មីក្រូហិរញ្ញវត្ថុ ភីអិលស៊ី បានខិតខំប្រឹងប្រែងបង្កើតសាខាថ្មីមួយ បន្ថែមទៀត គឺសាខាក្រុងដូនកែវ ខេត្តតាកែវ ដែលបានទទួលអាជ្ញាបណ្ណស្របច្បាប់ ពីធនាគារជាតិនៃកម្ពុជា កាលពីថ្ងៃទី០៧ ខែកុម្ភៈ ឆ្នាំ២០២៣។
ស្ថានភាពសេដ្ឋកិច្ចពិភពលោក ក្នុងតំបន់ និងសេដ្ឋកិច្ចប្រទេសកម្ពុជា មិនទាន់មានភាពល្អប្រសើរនៅឡើយទេ ហើយបើក្រឡេកមក មើលស្ថានភាពនៃវិស័យធនាគារ គ្រឹះស្ថានមីក្រូហិរញ្ញវត្ថុ និងគ្រឹះស្ថាន បង់រំលស់ ក៏ដូចជាគ្រឹះស្ថាន ហ្វូតាបា មីក្រូហិរញ្ញវត្ថុ ភីអិលស៊ី នៅក្នុងឆ្នាំ២០២៣ មកនេះក៏ជួបប្រទះបញ្ហាប្រឈមមួយចំនួនផងដែរជាពិសេសទៅលើការគ្រប់គ្រងគុណភាពឥណទាន ដែលបំណុល យឺតយ៉ាវមានការ កើនឡើងច្រើន ដោយគិតត្រឹមថ្ងៃទី៣១ ខែធ្នូ ឆ្នាំ២០២៣ គ្រឹះស្ថានបានបើកប្រតិបត្តិការមករយៈពេលជិត ៨ឆ្នាំទៅ ហើយដែលមានបុគ្គលិកសរុបចំនួន ៩២ នាក់ ស្ត្រីចំនួន ២៨ នាក់ និងបុរសចំនួន ៦៤ នាក់ ដែលកំពុងបម្រើការងារនៅការិយាល័យ កណ្តាល និងសាខាចំនួន ០៥ការិយាល័យសាខារួមមានទីស្នាក់ការ កណ្តាល (រួមជាមួយសាខាការិយាល័យកណ្តាល) សាខាខណ្ឌ ព្រែកព្នៅ សាខាខណ្ឌពោធិ៍សែនជ័យ សាខាក្រុងច្បារមន (ខេត្តកំពង់ស្ពឺ) និងសាខាក្រុងដូនកែវ (ខេត្តតាកែវ) ជាមួយនឹងអតិថិជន ដែលបាន នឹងកំពុងប្រើប្រាស់កម្ចីមានសរុប ៨៨៣នាក់ ស្មើនឹងផលបត្រឥណទានសរុប ១៤.៣៨៣.០៧៦ ដុល្លារអាមេរិក ក្រោមការ គ្រប់គ្រងរបស់មន្រ្តីឥណទានចំនួន ២៦ នាក់។ ផលប៉ះពាល់នេះបានធ្វើឱ្យគ្រឹះស្ថាន ហ្វូតាបា មីក្រូហិរញ្ញវត្ថុ ភីអិលស៊ី មានអត្រា ហានិភ័យផលបត្រឥណទានមានការកើនឡើងខ្ពស់ដល់អត្រា ១៥,៩៦% ហើយអតិថិជនយឺតយ៉ាវដែលត្រូវលុបចេញពីបញ្ជីក្នុងអត្រា ០,០៦% ប៉ុន្តែ បើទោះជាស្ថិតក្នុងស្ថានភាពនេះក៏ដោយ គ្រឹះស្ថាន ហ្វូតាបា មីក្រូហិរញ្ញវត្ថុ ភីអិលស៊ី នៅតែអាចរក្សាប្រាក់ចំណេញរបស់ ខ្លួននៅបំណាច់ឆ្នាំ២០២៣ ចំនួន ២៦០.៤៦៤ ដុល្លារអាមេរិក ជាមួយនឹងទ្រព្យសកម្មចំនួន ១៥.៥៨០.៨៦២ ដុល្លារអាមេរិក។
ទោះបីគ្រឹះស្ថាន ហ្វូតាបា មីក្រូហិរញ្ញវត្ថុ ភីអិលស៊ី មិនទាន់មានការិយាល័យប្រតិបត្តិការឱ្យបានទូលំទូលាយនៅទូទាំងប្រទេសកម្ពុជា ក៏ចក្ខុវិស័យរបស់យើងខ្ញុំ ត្រូវតែខិតខំអភិវឌ្ឍន៍ខ្លួនឱ្យក្លាយជាគ្រឹះស្ថានហិរញ្ញវត្ថុឈានមុខមួយនៅក្នុងព្រះរាជាណាចក្រកម្ពុជា ដើម្បីរួម ចំណែកក្នុងការអភិវឌ្ឍសង្គម និងកំណើនសេដ្ឋកិច្ចប្រកបដោយនិរន្តរភាពក្នុងពេលបច្ចុប្បន្ន ក៏ដូចពេលអនាគតតាមរយៈការធ្វើឱ្យមាន លំនឹងស្ថិរភាព តម្លាភាពលើផ្នែកទីផ្សារហិរញ្ញវត្ថុនៅកម្ពុជា និងផែនការយុទ្ធសាស្រ្តរយៈពេលវែងដែលនឹងពង្រីកតំបន់ប្រតិបត្តិការឱ្យ បានទូលំទូលាយបន្ថែមទៀតនៅតាមបណ្តាខេត្តផ្សេងៗទៀត ដែលជាបំណងប្រាថ្នាដ៏សុចរិត ក៏ដូចជាគោលដៅរបស់គ្រឹះស្ថានយើងខ្ញុំ ផងដែរ។
គ្រឹះស្ថានរបស់យើងខ្ញុំ នឹងរិះរកវិធីក្នុងការផ្ដល់ជូននូវសេវាដ៏សម្បូរបែប និងប្រកបដោយភាពច្នៃប្រឌិតខ្ពស់ លើដំណោះស្រាយហិរញ្ញ វត្ថុថ្មីៗ ជូនចំពោះអតិថិជនចាស់ និងថ្មីទាំងអស់។ កន្លងមកដើម្បីបំពេញតម្រូវការ របស់អតិថិជន គ្រឹះស្ថាន ហ្វូតាបា មីក្រូហិរញ្ញវត្ថុ ភីអិលស៊ី បានបង្កើតផលិតផលសេវាហិរញ្ញវត្ថុជាច្រើនដែលរួមមាន ឥណទានអាជីវកម្ម ឥណទានកសិកម្ម ឥណទានគេហដ្ឋាន ឥណទានសម្រាប់ប្រើប្រាស់ ឥណទានបុគ្គលិក ឥណទានសម្រាប់ការសិក្សា និងឥណទាននិយោជិត។ ចំពោះឥណទានបុគ្គលិក និង ឥណទានសម្រាប់ការសិក្សា ត្រូវបានផ្តល់ជូនក្នុងអត្រាការប្រាក់ទាបបំផុត ជាមួយនឹងសេវាល្អឥតខ្ចោះ ដែលមិនធ្លាប់មានក្នុងគោល ដៅចូលរួមលើកស្ទួយផ្នែកសង្គម គាំទ្រជីវភាពគ្រួសាររបស់បុគ្គលិក និងអភិវឌ្ឍ នូវវិស័យធនធានមនុស្ស។ 
ទន្ទឹមនឹងការបំពេញតម្រូវការអតិថិជនក្នុងអំឡុងឆ្នាំ២០២៣ យើងក៏បានយកចិត្តទុកដាក់លើការពង្រឹងប្រព័ន្ធ នៃការត្រួតពិនិត្យផ្ទៃក្នុង របស់ខ្លួន បង្កើតសាខាថ្មីបន្ថែមនៅខេត្តតាកែវ និងការកែសម្រួលរចនាសម្ព័ន្ធកម្រិត គណៈគ្រប់គ្រងដើម្បីឱ្យការប្រតិបត្តិមានភាពរឹងមាំ ដោយផ្តោតលើការបណ្តុះបណ្តាលចំណេះជំនាញបុគ្គលិក និងបច្ចុប្បន្នភាពលើគោលការណ៍នីតិវិធីនានា ព្រមទាំងត្រូវប្រតិបត្តិតាម ច្បាប់ ឬបទប្បញ្ញត្តិដែលតម្រូវដោយ ធនាគារជាតិនៃកម្ពុជា និងក្រសួងពាក់ព័ន្ធ។
ស្ថានភាពសេដ្ឋកិច្ចពិភពលោកអាចនឹងធូរស្រាល និងប្រព័ន្ធធនាគារនិងមីក្រូហិរញ្ញវត្ថុនៃប្រទេសកម្ពុជានូវ បន្តមានភាពរឹងមាំ ដែល បានធ្វើឱ្យសេដ្ឋកិច្ចក្នុងស្រុករបស់កម្ពុជានឹងវិលទៅរកភាពប្រក្រតីវិញនូវមុខរបរ និងអាជីវកម្មនានាមានដំណើរការល្អប្រសើរឡើងវិញនៅ ថ្ងៃខាងមុខឆាប់ៗ យើងសង្ឃឹម និងជឿជាក់ថា គ្រឹះស្ថានយើងខ្ញុំនឹងបន្តប្រតិបត្តិការប្រកបដោយប្រសិទ្ធភាព និងក្លាយជាមាគ៌ាសម្រាប់ អ្នកជំនាន់ក្រោយកម្ពុជា ដែលសម្រេចយកភាពត្រឹមត្រូវ ស្មើគ្នា និងរក្សាឱ្យបាននូវតម្លាភាព ជាមូលដ្ឋានក្នុងវិស័យសេវាហិរញ្ញវត្ថុ។ គ្រឹះស្ថាន ហ្វូតាបា មីក្រូហិរញ្ញវត្ថុ ភីអិលស៊ី បានការគាំទ្រមូលនិធិពីភាគទុនិកឯកកម្មសិទ្ធិនៃប្រទេសជប៉ុន ដែលយើងខ្ញុំអាចចាត់ ចែងប្រកបដោយភាពស្ទាត់ជំនាញ និងផ្តល់សេចក្តីសម្រេចចិត្តបានយ៉ាងឆាប់រហ័ស ដើម្បីបំពេញតាមតម្រូវការអតិថិជន។
ដើម្បីឱ្យ “សុបិនអតិថិជនក្លាយជាការពិត” យើងខ្ញុំរីករាយស្វាគមន៍សហការក្នុងការផ្តល់សេវាហិរញ្ញវត្ថុយ៉ាងកក់ក្តៅ និងជាទីទុកចិត្ត បំផុតជូនអតិថិជនទាំងអស់ និងគ្រប់ពេលវេលាដែលត្រូវការ។
ជាទីបញ្ចប់ ក្នុងនាមគណៈគ្រប់គ្រងគ្រឹះស្ថាន ហ្វូតាបា មីក្រូហិរញ្ញវត្ថុ ភីអិលស៊ី ខ្ញុំសូមថ្លែងអំណរគុណដល់អតិថិជន ភាគទុនិកជប៉ុន ក្រុមប្រឹក្សាភិបាល នាយករងប្រតិបត្តិ និងបុគ្គលិកទាំងអស់ ដែលតែងតែគាំទ្រ និងការខិតខំប្រឹងប្រែងក្នុងការអនុវត្តការងារទៅតាមការ ទទួលខុសត្រូវ និងផែនការយុទ្ធសាស្រ្តរបស់ គ្រឹះស្ថានកន្លងមក ក៏ដូចជាធនាគារជាតិនៃកម្ពុជា ដែលតែងតែផ្តល់ការសហការ និងការ គាំទ្រដល់គ្រឹះស្ថាន យើងខ្ញុំ។
សូមសុបិនរបស់លោកអ្នកក្លាយជាការពិត។